Opera: Í Óðamansgarði
Fyri fullum húsum varð Føroya fyrsta opera frumsýnd í Reykjavík í gjárkvøldið. Undir leiðslu av Bernhardi Wilkinson, varð opera Sunleif Rasmussens ‘Í Óðamansgarði’ framførd á tjóðpalli íslendinga.
– Tað var sjáldsamt at hoyra íslendingar syngja føroyskt, segði Heðin Mortensen borgarstjóri, ið var millum innbodnu gestirnar, nú Listahátíð er í íslendska høvuðsstaðnum.
Libretto’in, ið er teksturin í opera, varð vístur upp á veggin, so øll kundi fylgja við.
Tað er Dánjal Hoydal, ið hevur skrivað tekstin, ið byggir á søguna hjá Williami Heinesen um Marselius og Stellu Kristinu, sum í broytingarárunum møtast á fremmandari grund – í garðinum hjá einum óðum manni í Havn.
Millum gestirnar til føroysku frumframførsluna á íslendska Tjóðpallinum vóru Ólafur Ragnar Grímsson, forseti Íslands og Katrín Jákupsdóttir, ráðharri Íslands við undirvísingar-, granskingar- og mentamálum.
